Fáilte!

Cuireann Teastas Eorpach na Gaeilge (TEG) sraith scrúduithe agus cáilíochtaí ar fáil do dhaoine fásta atá ag foghlaim na Gaeilge. Tugann scrúduithe TEG deis d’iarrthóirí, ó ghlantosaitheoirí go leibhéil ardchumais, a gcumas a dheimhniú sa labhairt, sa chluastuiscint, sa léitheoireacht agus sa Ghaeilge scríofa.

Faoi láthair, cuirtear scrúduithe ar fáil ag cúig leibhéal éagsúla. I measc na n-iarrthóirí a thug faoi na scrúduithe go dtí seo tá:

  • foghlaimeoirí fásta i rang oíche i mBaile Átha Cliath a bhí ag tosú arís ar staidéar a dhéanamh ar an Ghaeilge den chéad uair ó 1970;
  • teagascóirí Gaeilge in ollscoil in Éirinn;
  • baill foirne de chuid comhairlí contae i gCiarraí, i nGaillimh, i dTiobraid Árann, sa Chlár agus ina lán contaetha eile;
  • iriseoirí Gaeilge;
  • múinteoirí Gaeilge i mbunscoileanna agus i meánscoileanna;
  • mic léinn ollscoile i gCeanada a bhí ag tosú ar staidéar a dhéanamh ar an Ghaeilge.

Is féidir le hiarrthóirí tabhairt faoin scrúdú cainte amháin, más mian leo cáilíocht faoi leith a bhaint amach sa teanga labhartha.

Bíonn na scrúdaithe ar siúl i mí Aibreáin agus i mí na Bealtaine i ndeich n-ionad in Éirinn agus i gceithre ionad thar lear. Tugann roinnt céadta foghlaimeoir faoi scrúduithe TEG gach bliain.

Cuireann siollabais agus scrúduithe TEG spriocanna foghlama cinnte roimh mhúinteoirí agus roimh fhoghlaimeoirí le go mbeidh na foghlaimeoirí in ann líofacht sa Ghaeilge a bhaint amach céim ar chéim.

Ní hamháin go gcabhraíonn TEG le foghlaimeoirí dul chun cinn a dhéanamh ina gcuid staidéir ar an Ghaeilge, is amhlaidh a úsáideann roinnt eagraíochtaí TEG sa phróiseas earcaíochta agus roghnaithe, lena chinntiú go mbeidh na scileanna teanga cuí ag na hiarrthóirí a cheapfar.  

Tá scrúduithe TEG bunaithe go ginearálta ar an Fráma Tagartha Comónta Eorpach do Theangacha (Comhairle na hEorpa, 2001).

Beidh an suíomh seo ina fhoinse eolais faoi gach gné de scrúduithe TEG le haghaidh foghlaimeoirí ag gach leibhéal, le haghaidh múinteoirí meánscoile agus múinteoirí a bhíonn ag teagasc na Gaeilge do dhaoine fásta, le haghaidh fostóirí agus le haghaidh eagraíochtaí Gaeilge. Tá súil againn go bhfaighidh tú gach eolas atá uait ar an suíomh seo. 


 

Scrúduithe TEG 

Ag na naisc thíos, gheobhaidh tú gach ábhar a bheidh ag teastáil uait ag gach leibhéal:  Siollabais, Páipéir Scrúduithe Shamplacha, Tuairiscí an Phríomhscrúdaitheora agus Ábhair Theagaisc Shamplacha

Nuacht is Déanaí

Scrúdú TEG B1 d'Iarrthóirí ar an MGO

Nov-9-2020
Tá feachtas earcaíochta ar siúl faoi láthair ag na hInstitiúidí Oideachais d’áiteanna ar an Máistir Gairmiúil san Oideachas (Bunmhúinteoireacht) a mbeidh tús á gcur leo i mí Mheán Fómhair 2021. Mar chuid den phróiseas iontrála, caithfidh iarrthóirí scrúdú TEG ag Meánleibhéal 1 (B1) a dhéanamh chun a gcumas sa Ghaeilge a mheas. Beidh ar mhic léinn 65% a ghnóthú sa scrúdú cainte mar choinníoll iontrála.

Scrúduithe TEG Eanáir agus Feabhra 2021

Oct-22-2020
Tá na dátaí do scrúduithe TEG Meánleibhéal 1 (B1) agus Meánleibhéal 2 (B2) a bheidh ar siúl i mí Eanáir agus Feabhra ar fáil anseo. Is féidir le hiarrthóirí ar an MGO gach eolas faoi Scrúdu Cainte TEG Meánleibhéal 1 (B1) a fháil anseo.

Scrúduithe TEG Iúil agus Lúnasa 2020 - uasdátú

Jun-15-2020
Mar gheall ar an gcoróinvíreas, ní foláir scrúduithe scríofa TEG a bhí le bheith ar siúl i mí Iúil agus Lúnasa 2020 a chur ar athló. Beidh scrúduithe cainte B1 agus B2 á reachtáil ar líne againn áfach agus tá sceideal nua scrúdaithe 2021 socraithe chomh maith.  

Cuir iarratas isteach ar Scrúdú TEG 2021

Foirmeacha anseo. Roghnaigh an fhoirm a bhaineann leatsa. 

Is féidir le grúpaí foghlaimeoirí scrúduithe cainte TEG a dhéanamh ag aon am den bhliain - cuir ríomhphost chuig teanga@mu.ie chun é seo a fhiosrú.

Beidh an fhoirm iarratais do dhaltaí meánscoile ar fáil ar líne go luath.